صلاح جاهين
الشوارع حواديت
حوداية الحب فيها
وحوداية عفاريت
واسمعي يا حلوة لما اضحكك
الشارع ده كنا ساكنين فيه زمان
كل يوم بيضيق زيادة عن ما كان
أصبح الآن بعد ما كبرنا عليه
زي بطن الأم ملناش فيه مكان
الشوارع حواديت
حوداية الحب فيها
وحوداية عفاريت
واسمعي يا حلوة لما اضحكك
الشارع دة رحنا فيه المدرسة
اللى باقي منة باقي واللى مش باقي إتنسى
كنسوه الكناسين بالمكنسة
بدموع لحظة أسى
أنا برضه كمان.. نسيت
الشوارع حواديت
حوداية الحب فيها
وحوداية عفاريت
واسمعي يا حلوة لما اضحكك
الشارع ده أوله بساتين وآخره حيطه سد
ليا فيه قصة غرام محكتش عنها لأي حد
من طرف واحد وكنت سعيد أوي
بس حراس الشوارع حطوا للحدوتة حد
الشوارع حواديت
حوداية الحب فيها
وحوداية عفاريت
واسمعي يا حلوة لما اضحكك
الشارع ده شُفتك إنتي ماشية فيه
لابسة جيب
وبلوزة وردي
وعاملة ديل حُصان وجيه
إتجاهك إتجاهي مشينا فيه
والشارع ده سحاب وتيه
بس لازم نستميت
والشوارع حواديت
حوداية الحب فيها
وحوداية عفاريت
واضحكي يا حلوة .. لما اسمّعك
***************************